نغمہ نگاراوراہم ترقی پسند شاعر”جاں نثار اخترؔ“ کا یومِ وفات

<p dir="RTL" style="text-align: justify;">
<strong>آج  ہی کے دن  18</strong><strong>؍</strong><strong>اگست 1976میں نغمہ نگار اور اہم ترقی پسند شاعر جانثار اختر کی موت ہوگئی تھی، اسی مناسبت سے یہ تحریر آپ کی خدمت میں پیش ہے۔</strong></p>
<p dir="RTL" style="text-align: justify;">
<strong>پیش کش : اعجاز زیڈ ایچ</strong></p>
<p dir="RTL" style="text-align: justify;">
نام سیّد جاں نثار حسین رضوی اخترؔ تخلص تھا۔ 8؍فروری 1914ء کو گوالیار میں پیدا ہوئے۔ ان کا آبائی وطن خیرباد (یوپی) ہے۔ جاں نثار نے ابتدائی تعلیم وکٹوریہ کالجیٹ ہائی اسکول گوالیار میں حاصل کی اور وہیں سے 1930ء میں میٹرک کا امتحان پاس کرکے مسلم یونیورسٹی علی گڑھ میں داخلہ لیا۔ 1937ء میں بی اے (آنرز)اور 1939ء میں ایم اے (اردو) کی ڈگریاں حاصل کیں۔ 1940ء میں ان کا تقرر وکٹوریہ کالج ، گوالیارمیں اردو لکچرر کی حیثیت سے ہوگیا۔ 1943ء میں ان کی شادی صفیہ سے ہوگئی جو اسرار الحق مجازؔ کی حقیقی بہن تھیں۔ 1947ء میں ملک آزاد ہوا۔ گوالیار کے حالات خراب ہونے کی وجہ سے اختر نے ریاست بھوپال میں سکونت اختیار کرلی۔ یہاں انھیں حمیدیہ کالج میں صدر شعبہ اردو وفارسی کی جگہ مل گئی۔ اس وقت صفیہ علی گڑھ میں پڑھاتی تھیں، وہ بھی اسی کالج میں لکچرر ہوگئیں۔ اختر ترقی پسند تحریک کے سرگرم کارکن تھے۔ حکومت ہند نے کمیونسٹ پارٹی پر پابندیاں عائد کردیں۔ چوں کہ ترقی پسند تحریک بھی اس پارٹی کی سرگرمیوں کا ایک رخ تھا اس لیے اختر کونوکری سے استعفا دینا پڑا اور انھوں نے بمبئی کی راہ لی۔ صفیہ حمیدیہ کالج، بھوپال میں ملازم رہیں۔ صفیہ، اختر کی جدائی میں کڑھ کڑھ کرتپ دق کے موذی مرض میں مبتلا ہوگئیں۔ اختر اپنی عسیر الحالی کی وجہ سے ان کا خاطر خواہ علاج نہ کراسکے۔ صفیہ لکھنؤ میں انتقال کرگئیں۔ صفیہ کے خطوط کے دو مجموعے ’’حرف آشنا“ اور ’’زیر لب‘‘ کے نام سے چھپ چکے ہیں۔ جاں نثار اختر بمبئی میں فلموں کے گیت لکھنے لگے، اس سے آمدنی میں بھی اضافہ ہوا اور شہرت بھی ملی۔ انھیں عارضۂ قلب لاحق ہوگیا اور وہ 18؍اگست 1976ء کو بمبئی میں انتقال کرگئے۔ جاں نثار نے شاعری کا ذوق وراثت میں پایا تھا۔ ان کی ادبی زندگی کا آغاز اور نشوونما علی گڑھ میں ہوئی۔ علی گڑھ کے دوران قیام یہ ’’انجمن اردوئے معلی‘‘ کے سکریٹری رہے اور ایک عرصے تک ’’علی گڑھ میگزین‘‘ کی ادارت کی۔</p>
<p dir="RTL" style="text-align: justify;">
<strong>ان کی تصانیف کے نام یہ ہیں</strong><strong><span dir="LTR">:</span></strong></p>
<p dir="RTL" style="text-align: justify;">
’’سلاسل، تارگریباں، نذر بتاں، جاوداں، گھر آنگن، خاک دل اورپچھلے پہر‘‘</p>
<p dir="RTL" style="text-align: justify;">
نومبر 1974ء میں انھیں ’’خاک دل‘‘ پر نہرو ایوارڈ کا تین ہزار روپے کا انعام ملا۔ اترپردیش حکومت نے ان کی ادبی خدمات کے اعتراف میں پانچ ہزار روپے کا عطیہ دیا۔ ان کی وفات کے بعد وزیر اعظم نے اپنے فنڈ سے دس ہزار روپے کا عطیہ ان کے خاندان کی امداد کے طور پر دیا اور اتنی ہی رقم حکومت مہاراشٹر نے دی۔</p>
<p dir="RTL" style="text-align: justify;">
<strong>ممتاز شاعر جاں نثاراخترؔ کے یومِ وفات پر منتخب اشعار بطور اظہارِ عقیدت</strong></p>
<p dir="RTL" style="text-align: justify;">
اب یہ بھی نہیں ٹھیک کہ ہر درد مٹا دیں</p>
<p dir="RTL" style="text-align: justify;">
کچھ درد کلیجے سے لگانے کے لیے ہیں</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
اور کیا اس سے زیادہ کوئی نرمی برتوں</p>
<p dir="RTL" style="text-align: justify;">
دل کے زخموں کو چھوا ہے ترے گالوں کی طرح</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
لوگ کہتے ہیں کہ تو اب بھی خفا ہے مجھ سے</p>
<p dir="RTL" style="text-align: justify;">
تیری آنکھوں نے تو کچھ اور کہا ہے مجھ سے</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
سو چاند بھی چمکیں گے تو کیا بات بنے گی</p>
<p dir="RTL" style="text-align: justify;">
تم آئے تو اس رات کی اوقات بنے گی</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
یہ علم کا سودا یہ رسالے یہ کتابیں</p>
<p dir="RTL" style="text-align: justify;">
اک شخص کی یادوں کو بھلانے کے لیے ہیں</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
آہٹ سی کوئی آئے تو لگتا ہے کہ تم ہو</p>
<p dir="RTL" style="text-align: justify;">
سایہ کوئی لہرائے تو لگتا ہے کہ تم ہو</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
اشعار مرے یوں تو زمانے کے لیے ہیں</p>
<p dir="RTL" style="text-align: justify;">
کچھ شعر فقط ان کو سنانے کے لیے ہیں</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
جب لگیں زخم تو قاتل کو دعا دی جائے</p>
<p dir="RTL" style="text-align: justify;">
ہے یہی رسم تو یہ رسم اٹھا دی جائے</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
ہم سے پوچھو کہ غزل کیا ہے غزل کا فن کیا</p>
<p dir="RTL" style="text-align: justify;">
چند لفظوں میں کوئی آگ چھپا دی جائے</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
قوتِ تعمیر تھی کیسی خس و خاشاک میں</p>
<p dir="RTL" style="text-align: justify;">
آندھیاں چلتی رہیں اور آشیاں بنتا گیا</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
ایک بھی خواب نہ ہو جن میں وہ آنکھیں کیا ہیں</p>
<p dir="RTL" style="text-align: justify;">
اک نہ اک خواب تو آنکھوں میں بساؤ یارو</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
مانا کہ رنگ رنگ ترا پیرہن بھی ہے</p>
<p dir="RTL" style="text-align: justify;">
پر اس میں کچھ کرشمہ عکس بدن بھی ہے</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
ہم سے بھاگا نہ کرو دور غزالوں کی طرح</p>
<p dir="RTL" style="text-align: justify;">
ہم نے چاہا ہے تمہیں چاہنے والوں کی طرح</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
ہم نے کاٹی ہیں تری یاد میں راتیں اکثر</p>
<p dir="RTL" style="text-align: justify;">
دل سے گزری ہیں ستاروں کی براتیں اکثر</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
موجِ گل موجِ صبا موجِ سحر لگتی ہے</p>
<p dir="RTL" style="text-align: justify;">
سر سے پا تک وہ سماں ہے کہ نظر لگتی ہے</p>
<p dir="RTL" style="text-align: justify;">
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔</p>
<p dir="RTL" style="text-align: justify;">
طلوعِ صبح ہے نظریں اٹھا کے دیکھ ذرا</p>
<p dir="RTL" style="text-align: justify;">
شکست ظلمتِ شب مسکرا کے دیکھ ذرا</p>