غالب انسٹی ٹیوٹ کے زیر اہتمام ’بزم غزل‘ کا انعقاد

غالب انسٹی ٹیوٹ کے زیر اہتمام اردو، فارسی اور موسیقی کلاسز کا مشترکہ اجلاس 5 ستمبر کو منعقد ہوا۔ اس موقع پر غالب انسٹی ٹیوٹ کے ڈائرکٹر ڈاکٹر ادریس احمد نے تمام شرکا اور طلبا کا استقبال کرتے ہوئے کہا کہ یکم جولائی سے ہم نے اردو، فارسی اور موسیقی کلاسز کا جو سلسلہ شروع کیا تھا وہ اپنی اختتامی منزل کی طرف بڑھ رہا ہے۔

ہم ان کلاسز کا ایک مشترکہ اجلاس بھی کرتے ہیں جس میں کوئی نہ کوئی ثقافتی پروگرام یا آپ کی تربیت کے لیے کوئی لکچر رکھا جاتا ہے۔

 اس مرتبہ معروف موسیقار جناب محمد عارف، ڈاکٹر ونود گندھار، جناب محمد کاشف نظامی اور محترمہ شباب نظامی کو مدعو کیا گیا ہے۔ مجھے امید ہے اس سے آپ الفاظ کی صحیح ادایگی اور موسیقی کے رموز سمجھ سکیں گے۔ اس پروگرام کی نظامت محترمہ منجو ترپاٹھی نے کی۔ جناب یونس وارثی نے وائلن نوازی سے حاضرین کو محظوط کیا۔

 جناب محمد عارف، ڈاکٹر ونود گندھار، جناب محمد کاشف نظامی اور محترمہ شباب نظامی نے اپنے مخصوص انداز میں غالب اور دیگر اساتذہ کا کلام پیش کیا جسے لوگوں نے بہت پسند کیا۔ اس پروگرام کو زوم ایپ کے ذریعے نشر کیا گیا جہا ں کثیر تعداد میں طلبا اور دیگر لوگوں اسے دیکھا اور پسندیدگی کا اظہار کیا۔