شہر وانم باڑی میں امتیاز اردو ہال کا شاندار افتتاح اور نعتیہ مشاعرہ

جشن میلاد نبیﷺ کے شاندار موقع پر بروز اتوار 2022-10-09 بعد نماز مغرب مسجد امین آباد، قادر پیٹ وانم باڑی کے روبرو امتیاز اردو ہال کا افتتاح، قابل صد احترام قاضی شہر مولانا حافظ سید عبدالرحمٰن صاحب معدنی دامت برکاتہم کی دعا کے ساتھ عمل میں آیا۔ افتتاح کے فوراً بعد نعتیہ مشاعرہ منعقد کیا گیا جس کی صدارت پروفیسر پی تنویر احمد صاحب، صدر شعبہء عربی اردو اسلامیہ کالج وانم باڑی نے فرمائی اور نظامت کے فرائض اسانغنی مشتاق رفیقی نے ادا کی۔

مدحت رسول ﷺ کے لئے سجائی گئی اس بابرکت اور پر نور مجلس کا آغاز جناب اصلپے امتیاز باشاہ کی تلاوت کلام پاک سے ہوا جس میں خادم شہر جناب اے ناصر خان صاحب ایم سی اور جناب بشیر احمد صاحب یم سی بطور  مہمانان خصوصی اور شہر وانم باڑی کے معتبر شعراء کرام جناب ایم ایل نثار احمد نثار، جناب الطاف حسین شاداب بے ڈھرک، جناب سراج زیبائی، جناب اکبر زاہد، جناب احمد نظیر، جناب اسانغنی مشتاق رفیقی، جناب امتیاز امتیازی، جناب اعجاز احمد اعجاز، جناب اصلپے امتیاز کے علاوہ نعت خوان حضرات جناب جاوید سلیم، جناب اپاپلے بشیر،شریک رہے۔ ڈاکٹر جی امتیاز باشاہ صاحب نےاس مبارک موقع پر جمع شعرائے کرام ، عمائدین شہر اور مہمانان کے لئے خطبہء استقبالیہ پیش کیا اور آخر میں ہدیہ تشکر ادا کیا۔