شوپیاں کے حاذق پرویز نے نیٹ یو جی امتحان میں ٹاپ کیا، مبارک بادی کا سلسلہ جاری

سری نگر،8 ستمبر

وادی کشمیر کے طلبا قومی سطح پر منعقد ہونے والے مسابقتی امتحانات میں مسلسل اپنی ذہانت و ذکاوت کا لوہا منوا کر وادی کا نام روشن کر رہے ہیں۔

جنوبی کشمیر کے ضلع شوپیاں سے تعلق رکھنے والے حاذق پرویز نے این ای ای ٹی۔ یو جی امتحان میں نہ صرف جموں و کشمیر میں ٹاپ کیا ہے بلکہ قومی سطح پر دسویں رینک حاصل کی ہے۔انہوں نے اس امتحان میں 720 میں 710 پوائنٹس حاصل کرکے دسویں رینک حاصل کی ہے۔

شوپیاں کے ٹرینز گاؤں کے حاذق پرویز کے والد پرویز احمد فروٹ تاجر ہیں اور ان کی والدہ گھریلو کام کرتی ہیں۔حاذق اپنی اس شاندار کامیابی کا سہرا اپنے والدین اور اساتذہ کے سر ہی باندھتے ہیں۔

ان کا کہنا ہے: ’میں اللہ کا شکر گذار ہوں کہ جس نے مجھے کامیابی سے ہمکنار کیا لیکن میری یہ کامیابی میرے والدین اور آکاش انسٹی ٹیوٹ سری نگر کے اساتذہ بالخصوص روہن جین سر جو ہمیں فزیکس پڑھاتے تھے، کی کاوشوں کے بغیر ممکن نہیں تھی‘۔انہوں نے کہا ‘میں نیٹ پاس کرنے کے لیے پر امید تھا لیکن دسویں رینک حاصل کرنا میری توقع سے باہر تھا‘۔

حاذق کا کہنا ہے کہ کامیابی کی سیڑھی پر چڑھنے کے لئے سخت محنت کے بغیر کوئی دسرا راستہ نہیں ہے۔انہوں نے کہامجھے بھی اپنے اس سفر خاص کر کورونا اور دیگر مسائل کی وجہ سے گونا گوں مشکلات کا سامنا کرنا پڑا۔