مدھیہ پر دیش سے پہلی’وندے بھارت ایکسپریس ٹرین‘کو دکھائی گئی ہری جھنڈی

وزیر اعظم مودی نے کہا،یہ ٹرین خود انحصاری کی طرف بڑھتے ہوئے ہندوستان کی علامت

وزیر اعظم نریندر مودی نے ہفتہ کو ملک کی 11ویں اور مدھیہ پردیش کی پہلی وندے بھارت ایکسپریس ٹرین کو ہری جھنڈی دکھائی۔ اس دوران پی ایم مودی نے ٹرین میں سفر کرنے والے بچوں سے بات چیت کی۔ بتا دیں کہ مضمون نویسی کے مقابلے کے بعد 300 سے زیادہ بچوں کا انتخاب کیا گیا ہے۔ یہ ٹرین رانی کملا پتی اسٹیشن اور حضرت نظام الدین اسٹیشن کے درمیان چلے گی۔

وندے بھارت ایکسپریس ٹرین کا افتتاح کرنے سے پہلے وزیر اعظم مودی نے اندور میں ہونے والے حادثے پر غم کا اظہار کیا۔ وزیراعظم نے کہا کہ وہ مرنے والوں کو خراج عقیدت پیش کرتے ہیں اور لواحقین سے اظہار تعزیت کرتے ہیں۔ میں زخمیوں کی جلد صحت یابی کے لیے دعا گو ہوں۔ مودی نے کہا کہ یہ ٹرین غلامی کی ذہنیت سے نکل کر خود انحصاری کی طرف بڑھتے ہوئے ہندوستان کی علامت ہے۔

اس سے پہلے وزیر اعظم مودی نے تینوں خدمات کے کمبائنڈ کمانڈرس کانفرنس کی اہم میٹنگ میں شرکت کی۔ یہ میٹنگ دارالحکومت بھوپال کے کشابھاو ٹھاکرے کنونشن سینٹر میں ہوئی۔ وزیر اعظم کے ساتھ قومی سلامتی کے مشیر اجیت ڈوول بھی بھوپال پہنچے ہیں۔