زامبیا کے ایک پارلیمانی وفد کی قیادت نیلی بوٹے کاشومبا موٹی نے جمعرات کو یہاں راشٹرپتی بھون میں صدر دروپدی مرمو سے ملاقات کی۔

راشٹرپتی بھون میں وفد کا خیرمقدم کرتے ہوئے صدر جمہوریہ نے کہا کہ ہندوستان اور زامبیا کے مضبوط اور خوشگوار تعلقات ہیں۔ زامبیا کی آزادی کی جدوجہد کے قائدین جیسے زا مبیا کے بانی اور پہلے صدر ڈاکٹر کینتھ کونڈا نے ہندوستانی جدوجہد آزادی، خاص طور پر مہاتما گاندھی سے تحریک حاصل کی۔

صدر مملکت نے کہا کہ اقتصادی تعاون کے شعبے میں ہماری دوطرفہ تجارت میں مسلسل اضافہ ہو رہا ہے۔ ہندوستان زامبیا میں سرکردہ سرمایہ کاروں میں سے ایک ہے۔ انہوں نے کہا کہ یہ اطمینان کی بات ہے کہ ہندوستان اور زامبیا کے درمیان مضبوط ترقیاتی شراکت داری ہے، جس میں ہندوستان کی چار لائن آف کریڈٹ شامل ہیں، جن کا استعمال ٹرانسپورٹ، ہائیڈرو پاور اور صحت جیسے اہم شعبوں میں کیا جا رہا ہے۔ انہوں نے ہندوستان اور زامبیا پر زور دیا کہ وہ خوشحالی اور ترقی کے لیے اس شراکت داری کو مضبوط بنانے کے لیے کام کریں۔

صدر جمہوریہ نے کہا کہ ہندوستان اور زامبیا کی پارلیمنٹ کے درمیان تعلقات ماضی کے پارلیمانی دوروں سے مضبوط ہوئے ہیں۔ انہوں نے زامبیا کی قومی اسمبلی کی طرف سے ہندوستان-زامبیا پارلیمانی دوستی گروپ بنانے کی کوششوں کی تعریف کی۔ انہیں یقین تھا کہ یہ دورہ ان رشتوں کو مزید مضبوط کرے گا۔