اردو اکادمی، دہلی کی جانب سے چلائی جارہی کمپیوٹر کلاسز کا نئے کمپیوٹر کے ساتھ سیشن کا آج آغاز عمل میں آیا
اس موقع پر اکادمی کے سکریٹری محمد احسن عابد نے کہا کہ ہم بہت دنوں سے کوشاں تھے کہ کمپیوٹر کلاس شروع کی جائے، جس کے لیے نئے سرے سے تمام تیاریاں مکمل ہوئیں۔
اس کلاس کو شروع کرانے کے لیے وائس چیئرمین حاجی تاج محمد کی بہت کوششیں رہیں، جن کے سبب ہم یہ کلاس شروع کررہے ہیں۔ آپ لوگ محنت کے ساتھ کمپیوٹر کلاس میں حصہ لیجیے ۔ امید ہے کہ آپ کامیاب و کامران ہوںگے اور اس سے آپ کی ترقی کے دروازے کھلیں گے۔
وائس چیئرمین حاجی تاج محمد نے اس موقع پر تمام طلبا کو مبارکباد پیش کی اور ان سے کہا کہ پابندی کے ساتھ کلاس میں حصہ لیں اور نئے کمپیوٹروں کے ساتھ وہ سب سیکھیں جس کی آپ خواہش رکھتے ہیں۔
انھوں نے اس کے لیے وزیراعلیٰ اروند کیجریوال اور نائب وزیراعلی منیش سسودیا کا شکریہ ادا کیا کہ وہ اردو کے فروغ اور طلبا کے اردو کمپیوٹر سیکھنے کے عمل سے بہت خوش ہیں اور ان کی توجہ کے سبب ہی ہم یہ کلاس شروع کررہے ہیں۔
گورننگ کونسل کے ممبر جاوید رحمانی نے اظہارِ خیال کرتے ہوئے کہا کہ آپ لوگ اپنی پوری تیاری کریں، دہلی میں آپ کی ترقی کے بہت امکانات ہیں، آپ جب دوسری زبانوں کے ساتھ ساتھ اردو کمپیوٹر کلاس میں بھی شرکت کریں گے تو یہ آپ کے لیے بڑی خوش آئند بات ہوگی۔
پروگرام کی نظامت کرتے ہوئے مستحسن احمد نے کورس کا مکمل تعارف کراتے ہوئے سکریٹری اکادمی، وائس چیئرمین اکادمی اور اکادمی کے سینئر اکاﺅنٹس آفیسر کلبھوشن اروڑا کا پروگرام میں شرکت کرنے پر شکریہ ادا کیا۔
