بھاگلپور میں فروغ اردو تقریبات کی میٹینگ

اردو زبان سیل،بھاگلپور میں جناب شبیر عالم،مترجم،جگدیش پور بلاک کی صدارت میں فروغ اردو تقریبات سب کمیٹی کی جائزہ میٹینگ ہوئ ۔اس میں پروگرام کی شاندار کامیابی کے لۓ تمام شرکاء بالخصوص بیرون بھاگلپور سے تشریف لاۓ مہمان کرام،مقامی ادباء و شعراء کی ساتھ ساتھ ایک ہزار سے زاید تمام سامعین باالخصوص ضلع کے اساتذہ اردو کا شکریہ ادا کیا گیا۔

ضلع مجسٹریٹ جناب سبرت کمار سین نے اس پروگرام کے انعقاد کے لئے شروع سے ہی دلچسپی لی اور ضلع اردو سیل کی فعال اور اردو سے بیحد دلچسپی رکھنے والی ایس ڈی ایم/انچارج ضلع اردو سیل کو ضروری ہدایت و رہنمائی کی،وہ بیحد مصروف شیڈیول سے وقت نکال کر تقریری مقابلہ کے کامیاب بچوں کی حوصلہ افزائی کے لئے تشریف لاۓ،انہیں میمونٹو اور میڈل عطا کیا اور مسکراتے ہوئے انکے ساتھ انفرادی اور گروپ فوٹو کھینچوایا ۔

اے ڈی ایم جناب محمد محفوظ عالم اور صدر ایس ڈی او جناب دھننجۓ کمار نے پروگرام کے آغاز سے قبل ہی تشریف لاکر انچارج ضلع اردو سیل محترمہ کومل کرن صاحبہ اور منتظمین اردو ملازمین کو اپنا سرگرم تعاون دیا،اس کے لۓ منتظمین ان کے بیحد شکر گزار ہیں۔

جناب حبیب مرشد خاں تقریباً پندرہ دنوں سے پروگرام کے انعقاد میں مستقل سرگرداں رہے

نشست میں تمام ملازمین اردو نے سبکدوش ملازم اردو اور تقریب فروغ اردو سیمینار ،مشاعرہ و عمل گاہ کو کامیاب اور تاریخ ساز بنانے کے لئے کنوینر تقریبات کمیٹی جناب حبیب مرشد خاں کا خصوصی شکریہ ادا کیا کہ وہ تقریباً پندرہ دنوں سے پروگرام کے انعقاد میں مستقل سرگرداں رہے۔

دیگر سبکدوش ملازمین اردو جناب شاہ نہال اختراور جناب کلیم آذر کا بھی تعاون کے لئے شکریہ ادا کیا گیا ۔میٹینگ میں تمام مقامی اردو صحافیوں،بہار و بیرونی بہار کے اردو اخبارات،مقامی ہندی اخبار و چینل کا بھی نیوز کوریج کے لئے اظہار تشکر کیا گیا۔

جنہوں نے بھی اس پروگرام کو امید سے زیادہ کامیاب بنانے میں تعاون کیا،ان سب کا بھی شکریہ ادا کرتے ہوئے آئندہ کے پروگرام کو مزید کامیاب بنانے کے لئے ضلع کے اردو دوستوں سے مشورہ مانگا گیا ہے اور گزارش کی گئ کہ فروری ماہ کے آخیر تک اپنا تحریری مشورہ ضلع اردو زبان سیل،کلکٹیریٹ،بھاگلپور کو ڈاک یا دستی طور پر دینے کی مہربانی فرمائیں ۔

ضلع اردو سیل میں منعقدہ نشست میں جناب حبیب مرشد خاں،جناب کلیم آذر،جناب محمد شمیم آزاد،محترمہ افشاں جبیں،مہ جبیں،مہر النسیہ، جناب عبدالقادر شریک ہوۓ، جناب ارشد مشتاق نے حاضرین کا شکریہ ادا کیا۔