نوجوانوں کے امور اور کھیل کے مرکزی وزیر جناب ٹھاکر نے آج نئی دہلی میں پیرالمپک کھیلوں میں تمغہ جیتنے والوں سمت انتل (جیولین تھرو ایف 64 گولڈ میڈل)، دیویندر جھاجھریہ (جیولین تھرو ایف 46 سلور میڈل)، یوگیش کتھونیا (ڈسکس تھرو ایف 56 سلور میڈل) اور شرد کمار (ہائی جمپ T63 برونز میڈل) کی عزت افزائی کی۔ نوجوانوں کے امور اور کھیلوں کے وزیر مملکت جناب نشیتھ پرمانک بھی اس موقع پر موجود تھے۔ سکریٹری، محکمہ کھیل، وزارت وائی اے ایس جناب روی متل اور وزارت کے افسران بھی موجود تھے۔

اس موقع پر خطاب کرتے ہوئے جناب ٹھاکر نے کہا، ”ہندوستان ہمارے پیرالمپکس کھلاڑیوں کی شاندار کارکردگی سے خوش ہے۔ ہم نے پچھلے سبھی پیرالمپک کے مقابلے میں پہلے ہی پیرالمپکس تمغوں کی برابری کر لی ہے! پیرالمپین ہندوستان کا فخر ہیں۔ ہندوستانی پیرا ایتھلیٹس کی شاندار کارکردگی نے نہ صرف ملک کا سر فخر سے بلند کیا ہے بلکہ ہمت بھی دی ہے کہ ہر خواب کو پورا کیا جا سکتا ہے۔ ٹوکیو پیرالمپکس میں ہندوستان نے اب تک کا سب سے بڑا دستہ بھیجا تھا اور اس ٹیم نے اب تک کی بہترین کارکردگی کا مظاہرہ کیا ہے اور تمغوں کی تعداد کو دوہرے ہندسوں میں پہنچا دیا ہے۔ وزیر اعظم جناب نریندر مودی نے جس طرح کھیلوں میں دلچسپی لی ہے اور کھلاڑیوں کی حوصلہ افزائی کی ہے، اس نے ہمارے کھلاڑیوں کو اپنا بہترین مظاہرہ کرنے میں مدد کی ہے۔ میں ایک بار پھر سمت انتل، دیویندر جھاجھریہ، یوگیش کتھونیا اور شرد کمار کو ان کی شاندار کارکردگی پر مبارکباد دیتا ہوں۔ یہ سب لاکھوں لوگوں کے لیے رول ماڈل بن چکے ہیں۔

انھوں نے مزید وضاحت کی کہ بین الاقوامی مقابلوں کے لیے کھلاڑیوں کو مدد فراہم کرنے میں حکومتی نقطہ نظر میں تبدیلی آئی ہے۔ وزیر موصوف نے انکشاف کیا کہ حکومت سہولیات اور فنڈنگ کے ساتھ ہندوستان کے پیرالمپین کھلاڑیوں کی مدد جاری رکھے گی تاکہ وہ بین الاقوامی سطح پر نمایاں کارکردگی کرتے رہیں۔ ٹارگٹ اولمپک پوڈیم اسکیم (ٹی او پی ایس) کو آگے بڑھایا جائے گا اور اس اسکیم کے تحت کھلاڑیوں کو زیادہ سے زیادہ تعاون فراہم کرنے کے لیے اسے مزید مضبوط کیا جائے گا۔

جناب ٹھاکر نے مزید کہا کہ میجر دھیان چند کے لیے اس سے بڑا خراج عقیدت نہیں ہو سکتا کہ ہمارے پیرا ایتھلیٹس نے قومی کھیلوں کے دن چار تمغے جیتے ہیں۔ اونی کی کارکردگی پر شری ٹھاکر نے کہا کہ ایک اولمپک میں دو تمغے جیتنا قابل ذکر ہے اور پوری قوم کو اس پر فخر ہے۔

اپنی بات چیت کے دوران، پیرا ایتھلیٹس نے کہا کہ یہ بے مثال ہے کہ ملک کے وزیر اعظم نے کھلاڑیوں کے ساتھ بات چیت کرنے اور ان کی حوصلہ افزائی کرنے میں ایسی ذاتی دلچسپی لی ہے۔ کھلاڑیوں نے محسوس کیا کہ یہ وزیراعظم کی حوصلہ افزائی کی وجہ سے ہے کہ اس بار کھلاڑیوں کا اعتماد بالکل مختلف سطح کا ہے۔ ان کو دی گئی مالی امداد اور سہولیات کی وجہ سے، کھلاڑیوں نے محسوس کیا کہ حکومت نے انھیں اپنایا ہے اور ان کی مدد کی ہے جس سے ان کے حوصلے میں زبردست اضافہ ہوا ہے۔