آپریشن دوست: راحت اور بچاؤ کاموں کے لئے ہندوستان کا چھٹا طیارہ ترکیہ پہنچا، وزیر خارجہ نے ٹویٹ کر دی معلومات

نئی دہلی، 9 فروری (انڈیا نیریٹو)

حکومت ہند کی جانب سے زلزلہ زدہ ترکیہ کی مدد کے لیے شروع کی گئی مہم ’’آپریشن دوست‘‘ کے تحت امدادی ٹیموں اور امدادی سامان کے ساتھ بھیجا گیا چھٹا طیارہ جمعرات کو ترکیہ پہنچا۔ وزیر خارجہ ایس جے شنکر نے اس سلسلے میں ٹویٹ کیا ہے کہ راحت اور بچاؤ کاموں کے لیے – امدادی ٹیمیں، ریسکیو آلات، ادویات اور طبی آلات تیار ہیں۔

اس سے قبل بدھ کی دیر رات، مرکزی وزیر مملکت برائے امور خارجہ وی مرلی دھرن نے ہندوستانی فضائیہ کے سی-17 گلوب ماسٹر طیارے کو ہنڈن ایئر بیس سے ریسکیو ٹیم اور امدادی سامان کے ساتھ روانہ کیا۔

انہوں نے کہا کہ وزیر اعظم نریندر مودی نے متعلقہ حکام کو ہدایت کی ہے کہ وہ ترکیہ میں زلزلے سے متاثر لوگوں کی مدد کے لیے ضروری اقدامات کریں۔ ترکیہ میں زلزلہ سے متاثرہ لوگوں کی مدد کے لیے بھارت نے وہاں ایک اسپتال بھی کھول دیا ہے۔ این ڈی آر ایف کی ٹیمیں اور ضروری آلات بھی بھیجے جا رہے ہیں۔

قابل ذکر ہے کہ 6 فروری کو ترکیہ اور شام میں تباہ کن زلزلہ آیا تھا۔ ترکیہ اور شام میں کئی زلزلوں نے بڑے پیمانے پر تباہی مچائی ہے۔ دونوں ممالک میں زلزلے سے مرنے والوں کی تعداد 12 ہزار سے تجاوز کر گئی ہے۔