کھیل کود اور فٹنس کے موضوع  پر اپنی نوعیت کے لحاظ سے منعقد ہونے والے اب تک کے اولین ملک  گیر کوئز یعنی فٹ انڈیا کوئز کا آغاز یکم ستمبر کو عمل میں آیا، تاکہ اسکولی بچوں میں فٹنس اور کھیل کود کے تئیں بیداری پیدا کی جاسکے۔

فٹ انڈیا کوئز بھارت میں اسکولی بچوں کے لیے اپنی نوعیت کا اولین فٹنس اور کھیل کود کوئز ہے اور اسے شرکت کے لیے مزید پرکشش بنایا گیا ہے۔ بھارت بھر کے اسکولی طلبا کے لیے ایک اضافی فائدے کے طور پر نوجوانوں اور کھیل کود کی وزارت نے یہ اعلان کیا ہے کہ ایک  لاکھ اسکولوں کی جانب سے نامزد کیے جانے والے اولین دو لاکھ طلبا  اب ملک گیر انڈیا کوئز کے لیے مفت رجسٹریشن کراسکتے ہیں۔ ہر اسکول  پہلے آؤ – پہلے پاؤ کی بنیاد پر زیادہ سے زیادہ2طلبا کو نامزد کرسکتا ہے۔

اس فیصلے کا اعلان نوجوانوں کے امور اور کھیل کود کے وزیر انوراگ سنگھ ٹھاکر نے اسکولی بچوں میں  فٹنس  اور کھیل کود کے تئیں بیداری پیدا کرنے کی غرض سے کیا ہے۔ فٹ انڈیا کوئز کا آغاز وزیراعظم کے تصور کے مطابق فٹ انڈیا تحریک کے ایک حصے کے طور پر کیا گیا ہے، جس نے ایک چاق وچوبند زندگی گزارنے کے لیے  بڑے پیمانے پر بیداری پھیلانے میں ایک اہم کردار ادا کیا ہے۔ جناب ٹھاکر نے کہا کہ زیادہ سے زیادہ طلبا فٹ انڈیا کوئز میں شمولیت اختیار کریں، اس کے مقصد سے پہلے ایک لاکھ اسکولوں کے دو لاکھ طلبا کے لیے شمولیت کی فیس معاف کردی گئی ہے۔  جناب ٹھاکر نے وزیر تعلیم جناب دھرمیندر پردھان کی موجودگی میں یکم ستمبر کو فٹ انڈیا کوئز کا آغاز کیا، جو اپنے نوعیت کا اولین ملک گیر کوئز برائے کھیل کود اور فٹنس ہے۔  ملک گیر کوئز کے تحت 3.25 کروڑ روپے کی خطیر رقم انعام دینے کے لیے مختص کی گئی ہے اور اسٹار اسپورٹس پر اس کا ملک گیر ٹیلی کاسٹ بھی کیا جائے گا۔

مذکورہ کوئز ایسا ہوگا، جس میں ملک کی ریاستوں / مرکز کے زیر انتظام علاقوں کی نمائندگی ہوگی اور یہ آن لائن اور براڈ کاسٹ راؤنڈس پر مشتمل ہوگا۔ اس کا خاکہ اس طرح وضع کیا گیا ہے کہ اس میں شمولیت کے تمام تر پہلوؤں کا لحاظ رکھا گیا ہے، جس کے تحت ملک بھر کے اسکول کے طلبا کو یہ موقع حاصل ہوگا کہ وہ  اپنی فٹنس کی جانچ کرسکیں گے اور اپنے سے پہلے کے افراد کے مقابلے میں یہ بھی جان سکیں گے کہ  کھیل کود کے بارے میں ان کی اپنی کتنی جانکاری ہے۔

فٹ انڈیا کوئز کے سلسلے میں شریک ہونے کے لیے  تفصیلات فٹ انڈیا ویب سائٹ پر دستیاب ہیں۔