نئی دہلی،19 جنوری (انڈیا نیریٹو)

کیرالہ میں منعقد جی-20 سربراہی اجلاس کے پہلے ہیلتھ ورکنگ گروپ کی میٹنگ کے دوسرے دن کی شروعات یوگا سے ہوئی۔ جمعرات کو ریاستی وزیر صحت ڈاکٹر بھارتی پروین پوار کے ساتھ میٹنگ میں تمام شرکاء نے ساحل سمندر کے قریب ایک گھنٹے تک یوگا کیا۔

اس دو روزہ اجلاس کے دوران ٹروئیکا میں پہلی بار تین ترقی پذیر اور ابھرتی ہوئی معیشتوں والے ممالک انڈونیشیا، بھارت اور برازیل حصہ لے رہے ہیں۔ ہندوستان نے یکم دسمبر کو جی 20 کی صدارت سنبھال لی ہے۔

2023 میں جی 20 کے ہیلتھ ٹریک میں ہیلتھ ورکنگ گروپ کے چار اجلاس منعقد کیے جائیں گے۔ وزارت صحت کا اجلاس بھی ہوگا۔ ترواننت پورم (کیرالہ)، گوا، حیدرآباد (تلنگانہ) سمیت ملک کے مختلف مقامات پر میٹنگیں منعقد کی جائیں گی۔