نئی دہلی، 19 جنوری (انڈیا نیریٹو)

مرکزی وزیر مملکت برائے داخلہ نتیانند رائے نے کہا کہ نیشنل ڈیزاسٹر رسپانس فورس (این ڈی آر ایف) بے لوث انسانی خدمات کے لیے وقف ہے۔ این ڈی آر ایف نے 8500 سے زیادہ بچاو کارروائیوں کے دوران اب تک 1.5 لاکھ سے زیادہ لوگوں کو بچایا ہے اور 7.5 لاکھ سے زیادہ لوگوں کو محفوظ مقامات پر منتقل کیا ہے۔

جمعرات کو دہلی میں این ڈی آر ایف کے 18ویں یوم تاسیس کے موقع پر منعقدہ ایک پروگرام سے خطاب کرتے ہوئے رائے نے کہا کہ وزیر اعظم نریندر مودی کی قیادت اور مرکزی وزیر داخلہ امت شاہ کی رہنمائی میں این ڈی آر ایف آج آفات مینجمنٹ کے شعبے میں اپنی بے لوث انسانی خدمات کی وجہ سے آفات رسپانس اور کم سے کم نقصان کے معاملے میں اپنے لیے ایک منفرد جگہ بناچکا ہے۔

رائے نے کہا کہ این ڈی آر ایف ملک کی واحد فورس ہے جو ملک کے کسی بھی علاقے میں کم سے کم وقت میں کثیر ہنر مند ریسکیورز، ہائی ٹیک اور جدید آلات کے ساتھ پہنچتی ہے تاکہ آفات کے دوران کاروائی کی جا سکے ۔

رائے نے کہا کہ جنوری 2020 میں ناگپور میں عالمی معیار کی این ڈی آر ایف اکیڈمی کا سنگ بنیاد مرکزی وزیر داخلہ امت شاہ نے رکھا تھا، جو جلد تیار ہو جائے گی۔ یہاں نہ صرف ہندوستانی بلکہ دوسرے دوست ممالک کے تربیت یافتہ افراد کو بھی ڈیزاسٹر مینجمنٹ کی اعلیٰ سطحی تربیت دی جائے گی۔